لاپه‌ڕه‌ی سه‌ره‌کی | وتاری ڕۆژ | به‌ره‌و به‌هاری ئازادی

به‌ره‌و به‌هاری ئازادی

گۆڕینی قه‌باره‌ی نوسین: Decrease font Enlarge font
به‌ره‌و به‌هاری ئازادی

به‌هار، وه‌رزی بووژانه‌وه ‌و بزووتنی دوباره‌ی سروشت بەرێەوەیە. هاتنی به‌هار، هێمایه‌كه بۆ ته‌واوبونی ته‌مه‌نی سه‌رما و توانه‌وه‌ی كۆشكی سه‌هوڵبه‌ندانی سته‌م و چه‌وسانه‌وه و هیوا به‌ساڵێكی باشتر له‌ پار له‌ ناخی دڵاندا دەبزوێنێت. هيوای دونیایه‌ك كه‌ تێدا ئازادی و ریفاهی گشتی، جێگای بێبه‌شی و بێ عه‌داله‌تی و نه‌بوونی، بگرێته وه‌ و ده‌رفه‌تی یه‌‌كسان بۆ گه‌شه‌ و خه‌مڵینی توانایه‌كانی ئینسان بۆ هه‌مووان دابین ‌بێت.
ئیمرۆ لە سەردەمێكدا دەژین كە هێزی دەست و بازوو و بیر و مێشكی ئینسانی داهێنەر و خوڵقێنەر، ئەو جیهانەی، لیواولیوی ئیمكاناتی ئاسودە بۆ ژیان كردوە، بەلام خولقێنەرانی ئەو سەروەت و ئیمكاناتە لە بەرهەمی رەنج و كاری خۆیان بێبەشن. بە سەدان میلیون ئینسان، شەوانە بە برسیەتی سەر دەنێنەوە و یان لە سەرەتاییترین مافی ئینسانی، بێبەشن. هەژاری و دژواریەكانی بەرێچوونی ژیانی خەڵكی زەحمەتكێش و دەست تەنگ، ده‌ڕه‌ی قووڵی چینایەتی نێوان سەروەت و هەژاری، بێ بەهرەبوونی جەماوەری خەڵك لە خزموتگوزارییە سەرەتاییەكان، بێكاری و بێ ئاسویی لاوان، نەبونی ئازادی و پێشێل كردنی سەرەتاییترین مافی دێموكراتیكی خەڵك، پەرەسەندنی جۆرەها دیاردەی ناشیرنی كۆمەڵایەتی، هەمووی ئەوانە دەستیان داوەتە دەستی یەك و ئەو جیهانە جوان و رازاوەیه‌یان، بۆ خولقێنەرانی، كردۆتە دۆزەخ.
بەراستی بۆچی وایە؟ ئەساسیترین وەلامی ئەو پرسیارە ئەوەیە، چونكە ئامانجی بەرهەم هێنان ، ئامانجی بەرهەمی كار، نەك دابین كردنی پیداویستیەكانی ژیانی ئینسان، بەڵكوو كۆكردنەوەی قازانجە. هەر بۆیە دەبینین هەركات قازانجی سەرمایەدارێك لە بوارێكدا روو لە كزی دەكات، یەكسەر به‌رهه‌مهێنان و كارخانەكەی دادەخات و روو لە جێگەیەكی دیكە دەكات. به‌رهه‌مهێنانه‌كه‌ی دەخەوینێ‌ ، تاكوو بەرهەمی زۆرتر دەستی بەشەر نەكەوێ‌ ، هەم كومەلگا توشی گرانی و كەمبونی پیداویستیەكانی ژیان دەكات و هەم كرێكار بێكار ده‌كات. ئەوەیە مەنتقی بەریوەچونی نیزامێك كە بناغەكەی لە سەر قازانجپەرەستی و چەوساندنەوەی ئینسان بە دەستی ئینسان دامەزراوە. كاتێك سود لە سەر یەك كەلەكە كردن، دەبێتە ئامانجی كاری ئینسان و سود دەچێتە گیرفانی كەسێكی ترەوە، ئنسانەكان، ئەوانەی كار دەكەن و لە سود بێ‌ بەهرەن لە بەرهەمی كاری خۆیان، نامۆو بێگانە دەبن. 
چاو لە سەفحەی تەلەویزیونەكانتان بكەن، بە كانالە جوراوجۆرەكاندا بگەڕێن، ئایا سیمای جیهانێك نابینن، پڕ لە ئەزمە، پڕ لە كیشمەكێش؟ ئایا نابینن كە چۆن ئەو نیزامە، ئەمنیەتی لە ژیانی ئینسان هەلگرتۆە، ئەمنیەتی گیانی، ئەمنیەتی رەوانی، ئەمنیەتی شوغڵی، توند و تیژی بۆتە دیاردەیەكی ئاسایی، رەحم بە ئینسان كە سەهلە بە ژینگەی ئینسانیش ناكرێ‌، ئایا ئەوەی دەبینین شایستەی ئینسانی ئەمرویە؟ ئایا بەراستی ئەكسەریەتی جەماوەری خەلك لە چوارگۆشەی جیهان بەم بارودۆخە رازین؟ ئایا ئەم بارودۆخە بە چارەنوسی چارهەلنەگری خۆیان دەزانن؟ بیگومان رازی نین، هەر بۆیە لە هەموو شوێنێكی جیهان، شاهیدی بەرەنگاربونەوە و موقاوەمەت لە شكل و شیوەی جوراوجۆرییداین. ئەگەر خەلكێكیش هەبن كە نەزانن خەباتەكەیان بەرەو كوێ دەچێت، بێگومان ئەوە دەزانن كە ئەو وەزعە، شایستەی ئەوان نییە و پێویستە بگورێ‌.
لە ئیرانی ژێر دەسەلاتی رژیمی كۆماری ئیسلامیدا، هەرچی دیاردەی دزێو و ناشیرینی نیزامی سەرمایەداریە، بە چەند قات زیاتر، ئەو ولاتەیان داگرتۆە. لەم ئیرانەدا رژیمیك لە سەركارە كە، ئاكار و كردەوەی، سیاسەت و هەلوێستی، فەلسەفە و بیروبۆچونی، هەمووی مایەی شەرمەزاری بەشەریەتی سەردەمی ئیمەن. ئەو رژیمە لە گەل ئاستی بەروپێشچوون و پیشكەوتنی كۆمەلایەتی و فەرهەنگی ئەكسەریەتی خەلكی ئەو وڵاتە، ناتەبایە و بە حوكمی ئەو ناتەباییە، دەبێ‌ بروات و بێ‌گومان دەروات. هەل ومەرجی سیاسی وكۆمەڵایەتی ئەمڕۆی ئێران، ئەوەمان پێدەلێ كە لە لایەكەوە، ئەو وەزعە قابیلی تەحەمول نییە و لە لایەیەكی دیكەوە بۆ گورانكاری جیدی لە داهاتووی ئیران، خەلكی ئەو ولاتە ناتوانن بە هیچ هێزێك، جگە لە هێزی خۆیان پشت ببەستن. بۆ جەماوەری خەلك، هیوایەك بە گورانكاری لە ناوخۆی رژیمەوە نەماوە. بالەكانی ناوخوی رژیم، هەمووی تاقی كرانەوە و هەرهیوایەكیش كە كەسانێك بە گۆرانكاری لە سەر دەستی ئەوان بووبێتیان، بۆتە بڵقی سەرئاو. خۆشباوەڕی بە رزگار بوون لەڕێگای دەست تێوەردانی دەرەكی، ئەوەش ئەمرۆ نەماوە. رووخانی رژیم لە ریگای دەست تیوەردانی دەرەكی نە لە ئارا دایە و ئەزمونی هەموو جیهانیش نیشانیداوە كە ئەگەریش لە ئارادابێ‌، ئامریكا و باقی زلهیزەكان، پێیان ناوەتە هەر شوینێك، نەك هەر ژیانێكی بەختەوەریان بۆخەڵكی ئەو وڵاتە بە دیاری نەهێناوە، بەلكوو ئاسایشیان لە خەلك هەلگرتووە و شەڕ و نائەمنی و كێشە و ململانێی نەتەوەیی و مەزهەبی و چی دیاردەی كۆنەپەرەستانە كە زەمینە و ئیمكانی هەبووە، بوژاندویانەتەوەو بە جێیان هێشتۆە. كە وایە ئەگەر بمانەوێ داهاتووی سیاسی ئەو وڵاتە بە هێزی دەست و بازوو بیر و هۆشی خۆمان بونیات بنێینەوە، ئەوا دەبێ خۆمان، هەموومان پێكەوە قۆلی هیمەتی لێ هەڵمالین. كرێكارانی ئەو وڵاتە كە قورسایی باری قەیرانی ئابووری ئێستای ئێران بە سەر شانی ئەواندا، دەشكێتەوە و لە ژێر هێلی هەژاریدا ئەژین، تەسلیمی ئەو هەلومەرجە زاڵمانەیە نابن كە بە سەریاندا سەپێندراوە، بەڵكوو بەرەو رێكخراو بوون و یەكگرتوویی هەنگاو هەڵدەگرن. ئەو نەفرەتەی كە لە ناخی ژنانی ئەو وڵاتەدا، بەرانبەر بە رژیمی ئیسلامی كە پارێزەری دزێوترین رواڵەتی ستەمكێشی رەگەزیە، پنگی خواردووە، هێزی یەكسانیخواز لەو كۆمەڵگایەدا بە گوڕوتینتر دەكات. لاوانی ئەو وڵاتە كە بە نرخترین ساڵەكانی تەمەنیان، پڕە لە نیگەرانی بەرانبەر بە داهاتووی ناڕوونیان و لە خۆشیەكانی ئەم دەورەیەی ژیانیان بێبەشن، جەسورانەتر دێنە مەیدان تا مافی خوراوی سەرەتایی و ئینسانی خویان لە گەروی ئەو رژیمە دەربێنن و ئاسۆی ژیانی دوارۆژیان روون كەنەوە. كۆمەلانی خەڵكی كوردستان بە دەرس وەرگرتن لە ئەزموونی سی و پێنج ساڵەی خەباتی بێ پسانەوەیان، زیاتر لە دەوری هیزی رادیكال و پێشڕەو كۆدەبنەوە، ئەوانە هەمووی چاوەڕوانی و هیوای ئێمە بۆ ساڵی نوێن. ئەو هیوایە خۆسازدانێكی گورج و گۆڵتر و تێكۆشانی وشیارانە و ماندوونەناسانەی، لە هەموو بەرەكانی ئەم نەبەردەدا لێمان دەوێت. تەنیا بە ستراتێژ و تاكتیك و سیاسەتی روون‌ و بە پشت بەستن بە هێزێكی كۆمەلایەتی كە هیچ قازانجێكی لە پاراستنی ئەو نیزامەدا نییە، چارەنوسی قەیرانی سیاسی و ئابوری ئیستای كۆمەلگای ئیران لە بەرژەوەندی زۆرینەی دانیشتوانی ئەم كۆمەلگایە، چارە سەر دەبێت و ئاسۆی سەركەوتنی یەكجاری، بۆ ئینسانی مافخوراو و چەوساوە و ستەملێكراوی ئەو وڵاتە دەردەكەوێ. رێپێوان لەو رێگایەدا بەرەو ئاسۆی روون، زەمانەتی دوارۆژی رزگاری و سەرچاوەی ژیانی پڕ لە هیوا و شادی، هەر ئەمرۆشمانە. با لە سەرەتای سالی نویدا، پەیمان ببەستین هەمووان پێكەوە، دەست لە ناو دەستی یەك، ئەو رێگەیە ببڕین.

  • ناردنی هه‌واڵ به‌ ئیمێل ناردنی هه‌واڵ به‌ ئیمێل
  • چاپكردنی هه‌واڵ چاپكردنی هه‌واڵ
  • ته‌نها به تێکست ته‌نها به تێکست

Tagged as:

هیچ چاوگێک بۆ ئه‌م هه‌واڵه دیارینه‌کراوه

هه‌ڵسه‌نگاندنی هه‌واڵ

0