لاپه‌ڕه‌ی سه‌ره‌کی | به‌ڵگه‌نامه‌ | راپۆرتێك له‌ به‌ڕێوه‌چوونی كۆنگره‌ی ١٦ی كۆمه‌ڵه (رێكخراوی كوردستانی حیزبی كومۆنیستی ئێران) به‌شی دووهه‌م

راپۆرتێك له‌ به‌ڕێوه‌چوونی كۆنگره‌ی ١٦ی كۆمه‌ڵه (رێكخراوی كوردستانی حیزبی كومۆنیستی ئێران) به‌شی دووهه‌م

گۆڕینی قه‌باره‌ی نوسین: Decrease font Enlarge font
راپۆرتێك له‌ به‌ڕێوه‌چوونی كۆنگره‌ی ١٦ی كۆمه‌ڵه (رێكخراوی كوردستانی حیزبی كومۆنیستی ئێران) به‌شی دووهه‌م

یه‌كێكی دیكه‌ له ‌باسه‌ گرینگه‌كانی كۆنگره‌ و راپۆرتی سیاسی كومیته‌ی ناوه‌ندی، لێكدانه‌وه‌ی بارودۆخی سیاسی ئێستای ئێران بوو. له‌ راپۆرتی كومیته‌ی ناوه‌ندی كۆمه‌ڵه‌دا ته‌ئكید كرابووه‌وه‌ كه‌:

سه‌رمایه‌داریی ئێران تووشی ئه‌زمه‌یه‌كی به‌رده‌وامه‌. درێژه‌ی ئه‌م ئه‌زمه‌یه‌ بۆته‌ هۆی ئیفلاس هێنان و داخرانی كارخانه ‌و ناوه‌نده‌كانی به‌رهه‌مهێنان یان دابه‌زینی ئاستی به‌رهه‌مه‌كانیان. به‌شێكی زۆر له ‌سه‌رمایه‌ی ئه‌و وڵاته‌ له ‌بواری به‌رهه‌مهێنانه‌وه‌ گواستراوه‌ته‌وه‌ بۆ بواری دارایی و بازرگانی، ئه‌مه‌ش بێكاری به‌رینی كرێكارانی لێكه‌وتۆته‌وه‌. درێژه‌ی سزا ئابوورییه‌كان، به‌ تایبه‌ت له‌ بارودۆخێكدا كه‌ به‌شی زۆری پێداویستیه‌كانی رۆژانه‌ی جه‌ماوه‌ری خه‌ڵك له ‌رێگای بازرگانی خاریجیه‌وه‌ دابین ده‌بێت، وه‌زعیه‌تی ئابووری وڵاتی شپرزه‌تر و ژیانی جه‌ماوه‌ری خه‌ڵكی دژوارتر كردووه‌. هێرشی هه‌مه‌لایه‌نه‌ بۆسه‌ر ئاستی ژیانی كرێكاران، په‌ره‌سه‌ندنی رێژه‌ی بێكاری، تووندبوونه‌وه‌ی ئاستی چه‌وساندنه‌وه‌ و داسه‌پاندنی حه‌قده‌ستی سێ قات له ‌ژێر هێڵی هه‌ژاری به‌سه‌ر كرێكاران، دواكه‌وتنی دانی هه‌ر ئه‌و حه‌قده‌سته‌ كه‌مه‌ش، گرانیه‌كی بێ سنوور و په‌ره‌سه‌ندنی ئازاره‌ كۆمه‌ڵایه‌تیه‌كان، له‌ئاكامه‌كانی ئه‌م ئه‌زمه‌ ئابووریه‌ن.

رژیمی كۆماری ئیسلامی نه‌ك هه‌ر توانای كۆنترۆڵ كردنی ئه‌و ئه‌زمه‌یه‌ی نییه‌، به‌ڵكوو نائاسایی بوونی سیسته‌می سیاسی و ریشه ‌داكوتانی گه‌نده‌ڵی له‌ پێكهاته‌ی دارایی و ئابوورییه‌كه‌ی، ره‌وتی ئه‌زمه‌ و ئیفلاسی ئابووری رژیمی تووندتر كردۆته‌وه‌. دوای تێپه‌ڕ بوونی ساڵی به‌سه‌ر هاتنه‌ سه‌ر كاری ده‌وڵه‌تی رۆحانی و ئه‌وه‌یكه‌ رژیمی كۆماری ئیسلامی كه‌وتۆته‌ سه‌ر خه‌تی سازان له‌گه‌ڵ ئه‌مریكا و هێزه‌ ئیمپریالیستیه‌كانی دیكه ‌و كه‌مبوونه‌وه‌ی زه‌ختی سزا ئابووریه‌كانیش، ئه‌زمه‌ی ئابووری ئێران به‌ره‌و چاره‌سه‌ربوون ناچێت. به ‌پێچه‌وانه‌ی ئیدیعای به‌شێك له‌ ئۆپۆزیسیۆنی بۆرژوایی، ریشه‌ی ئابووری ئێران نه‌ك له ‌مودیریه‌تی خراپی ده‌وڵه‌ته‌كانی پێشوو و یان زه‌ختی سزا ئابوورییه‌كان، به‌ڵكوو له ‌پێوه‌ندیه‌كانی نیزامی سه‌رمایه‌داری ئێران دایه ‌و ده‌سه‌ڵاتی كۆماری ئیسلامی هۆكاری تووندبوونه‌وه‌یه‌تی. كه‌وایه‌ ئاسایی بوونه‌وه‌ی پێوه‌ندیه‌كانی له‌گه‌ڵ ده‌وڵه‌تانی رۆژئاوا، خۆی له‌خۆیدا نه‌ ده‌بێته‌ هۆی گه‌شه‌ی ئابووری ئێران و نه‌ ژیان و كرێكاران و خه‌ڵكی زه‌حمه‌تكێش باشتر ده‌كات. ده‌وڵه‌تی حه‌سه‌نی رۆحانی كه‌ به‌ به‌ڵێنی رزگاركردنی ئابووری ئێران له‌ لێكترازان و دابین كردنی ژیان و به‌ڕێچوونی باشتر بۆ كرێكاران، له ‌رێگه‌ی سازان له‌گه‌ڵ ده‌وڵه‌تی ئه‌مریكاوه‌ هاته‌ سه‌ركار، به‌كرده‌وه‌ نیشانی دا نه‌ك هه‌ر به‌رنامه‌یه‌كی بۆ باشتركردنی وه‌زعی ژیانی كرێكاران و خه‌ڵكی زه‌حمه‌تكێش له‌ده‌ستووردا نییه‌، به‌ڵكوو هێرشێكی هه‌مه‌لایه‌نه‌شی بۆ سه‌ر ئاستی ژیانی خه‌ڵكی بێبه‌ش له ‌ئێران و هه‌رزان كردنی هێزی كار هه‌وڵ ده‌دات كه ‌هانده‌ری سه‌رمایه‌دارانی ناوخۆ و ده‌ره‌كی بۆ به‌ده‌ستهێنانی قازانجی زۆرتر له‌ئێران بێت.
په‌ره‌سه‌ندنی ناڕه‌زایه‌تی و مانگرتنه‌ كرێكارییه‌كان له‌م مانگانه‌ی دواییدا نیشان ده‌دات كه‌ كرێكاران بۆ پێشگرتن له‌ تێداچوونی جه‌سته‌ و ده‌روونیان، هێچ رێگایه‌كیان بێجگه‌ له‌ خه‌بات له‌دژی بارودۆخی زاڵ به‌سه‌ر ئه‌و وڵاته‌ بۆ نه‌ماوه‌ته‌وه‌. به‌محاڵه‌شه‌وه‌ ئاشكرایه‌ ئه‌م خه‌باته‌ كه‌ پرژوبڵاوه‌ و پێوه‌ندیان به‌یه‌كه‌وه‌ نییه‌، له ‌ئاستی هێزی چینی كرێكار و له ‌ئاستی وشیاری و ئه‌زمونێك كه‌ هه‌ڵسووڕاوان و پێشڕه‌وانی بزووتنه‌وه‌ی كرێكاری هه‌یانه‌، نییه‌. به‌ڵام هه‌ر ئه‌و خه‌باته‌ پرژوبڵاوه‌، نیشان ده‌دات كه‌ چ هێزێكی له‌ بن نه‌هاتوو بۆ گۆڕینی ئه‌و بارودۆخه‌ له ‌قووڵایی ئه‌و كۆمه‌ڵگایه‌دا خه‌وتووه‌.
په‌لاماری هه‌وسارپچڕاو بۆسه‌ر مافی تاكه‌كه‌سی و كۆمه‌ڵایه‌تی ژنان و داسه‌پاندنی هه‌ڵاواردنی ره‌گه‌زی به‌سه‌ریاندا بۆته‌ پێویستیه‌كی سیاسی بۆ به‌رده‌وام مانه‌وه‌ی رژیم. به‌هه‌ر راده‌یه‌ك كه‌ ئاستی پشت هه‌ڵكردن له‌ مه‌زهه‌ب و ئیفلاسی ئایدئۆلۆژیكی رژیمی كۆماری ئیسلامی ئاشكراتر ‌بێت، رێبه‌رانی رژیم بۆ به‌ره‌وڕوو بوونه‌وه‌ له‌گه‌ڵ ئه‌م ره‌وته،‌ سیاسه‌تی دژی ژنی خۆیان په‌ره‌پێده‌ده‌ن و به ‌بیانووی به‌ڕێوه‌نه‌بردنی یاساورێسای ئیسلامی، هێرش بردن بۆسه‌ر ژنان ده‌كه‌ن به‌ ئامرازێك بۆ ترساندن و تۆقاندنی هه‌موو كۆمه‌ڵگا.
له ‌دوایین به‌شی باسه‌كان سه‌باره‌ت به ‌بارودۆخی سیاسی ئێران، باس له‌ ئاراسته‌ی ستراتێژیكی حیزبی كومۆنیستی ئێران بۆ به‌ره‌وڕووبوونه‌وه‌ له‌گه‌ڵ ئه‌م بارودۆخه‌ كرابوو. له‌م پێوه‌نده‌دا سه‌ره‌تا دوو به‌ربه‌ستی سه‌ره‌كی ته‌ئكیدیان له‌سه‌ر كرا‌. یه‌كه‌م: بوونی دوژمنێكی سه‌ركوتگه‌ر كه‌ له ‌رێگه‌ی به‌كارهێنانی تووندترین شێوه‌ی سه‌ركوت، درێژه‌ به‌مانه‌وه‌ی خۆی له‌ده‌سه‌ڵات ده‌دات. دووهه‌م: له‌به‌رده‌ست نه‌بوونی به‌دیلی سۆسیالیستی له‌ئاستێكی كۆمه‌ڵایه‌تیدا وه‌كوو ته‌نیا رێگاچاره‌ی یه‌كجاری رزگاری كۆمه‌ڵگای ئێران له‌و ئه‌زمه‌یه‌ی كه‌ تێیدایه‌. دوای ئه‌وه‌ دوو ته‌وه‌ره‌ی سه‌ره‌كی ستراتێژی ئێمه‌ له‌ده‌وره‌ی داهاتوو، جه‌ختیان له‌سه‌ر كرا‌.
یه‌كه‌م، به‌ره‌وپێش چوونی بزووتنه‌وه‌ی سۆسیالیستی چینی كرێكار له ‌گره‌وی زاڵبوون به‌سه‌ر ئه‌و كه‌ند و كۆسپانه‌دایه‌ كه‌ هاتوونه‌ته‌ سه‌ر رێگای رێكخستنی چینی كرێكار و هاتنه‌ مه‌یدانی بزووتنه‌وه‌ی كرێكاری وه‌كوو بزووتنه‌وه‌یه‌كی سیاسی. چینی كرێكار ته‌نیا له‌كاتێكدا كه‌ له ‌ئاستی جه‌ماوه‌ری له ‌رێكخراوی چینایه‌تی خۆیدا رێكخرابێت و هه‌ڵسووڕاوان و رێبه‌رانی له‌ حیزبی سیاسی كومۆنیستی خۆیاندا كۆببنه‌وه‌، ده‌یتوانی به‌ حزوری سیاسی خۆی به ‌شێوه‌یه‌كی عه‌ینی رێبه‌رایه‌تی بزووتنه‌وه‌ پێشڕه‌و و دیموكراتیكه‌كانی دیكه به‌ده‌سته‌وه‌ بگرێت.
دووهه‌م، پێویسته‌ به ‌روونی مه‌علووم بێت كه‌ مانای رووخانی شۆڕشگێڕانه‌ی كۆماری ئیسلامی و سه‌ركه‌وتنی شۆڕش بۆ كرێكاران و كۆمه‌ڵانی خه‌ڵكی زه‌حمه‌تكێش چییه‌؟ پێویسته‌ به‌ روونی جه‌ماوه‌ری خه‌ڵك بزانن ده‌سه‌ڵاتێك كه‌ دێته‌ جێگای ئه‌و رژیمه‌، ئه‌رته‌ش و سپای پاسداران و هێزه‌ ئینتزامی و هه‌موو ناوه‌نده‌كانی سه‌ركوت و بڵاوكردنه‌وه‌ی خورافه‌ و درۆی كۆماری ئیسلامی هه‌ڵده‌وه‌شێنێته‌وه‌. قانوونی ئه‌ساسی و یاساكانی دیكه‌ی دژه‌ ئینسانی كۆماری ئیسلامی هه‌ڵده‌وه‌شێننه‌وه‌. بۆ تێكشكاندنی مقاومه‌تی دژه‌ شۆڕش، بۆ دیفاع له ‌ئازادی، بۆ سه‌ركوتی موقاومه‌تی كۆماری ئیسلامی و به‌ره‌وڕووبوونه‌وه‌ له‌گه‌ڵ په‌لاماری هه‌ر هێزێك كه‌ ده‌ستدرێژی بكاته‌ سه‌ر ئازادی و مافی خه‌ڵك، كرێكاران و خه‌ڵكی شۆڕشگێڕ له ‌رێكخراوه‌ جه‌ماوه‌رییه‌كانی خۆیاندا چه‌كدار ده‌بن. تێكه‌وه‌پێچانی نیزامی دیكتاتۆری كۆماری ئیسلامی به‌واتای ئه‌وه‌یه‌ كه‌ هه‌موو سیاسه‌ت و كرده‌وه‌ی ئه‌و رژیمه‌ له ‌كۆمه‌ڵگای ئێران ده‌سڕێته‌وه‌ و ویست و داخوازی ئازادیخوازانه ‌و یه‌كسانیخوازانه‌ی جه‌ماوه‌ری خه‌ڵك دابین ده‌بێت. تێكه‌وه‌پێچانی نیزامی دیكتاتۆری به‌ واتای ئه‌وه‌یه‌ كه‌ ئازادی بێ شه‌رت و مه‌رجی سیاسی، ئازادی ده‌ربڕینی بیروباوه‌ڕ، ئازادی پێكهێنانی حیزب و هه‌رجۆره‌ رێكخراوێكی پیشه‌یی و سیاسی، دابین بوونی یه‌كسانی ژن و پیاو له ‌هه‌موو بواره‌كانی ژیانی ئابووری، سیاسی، كۆمه‌ڵایه‌تی و بنه‌ماڵه‌یی دابین ده‌بێت. ته‌نیا له‌م حاڵه‌ته‌دایه‌ كه‌ به‌ره‌وپێش چوون و قووڵبوونه‌وه‌ی شۆڕش زه‌مانه‌ت ده‌كرێت.

ماویه‌تی...

  • ناردنی هه‌واڵ به‌ ئیمێل ناردنی هه‌واڵ به‌ ئیمێل
  • چاپكردنی هه‌واڵ چاپكردنی هه‌واڵ
  • ته‌نها به تێکست ته‌نها به تێکست

Tagged as:

هیچ چاوگێک بۆ ئه‌م هه‌واڵه دیارینه‌کراوه

هه‌ڵسه‌نگاندنی هه‌واڵ

0